潮語推陳出新，最新係邊句？當然係財爺曾俊華「行開啦」。鬍鬚曾上周遭社民連「長毛」梁國雄當面大撒陰司紙，佢臉露煩厭之色，叫長毛「行開啦！」。曾經喺美國留學嘅鬍鬚曾話，自己喺外國見識過街頭衝突，叫做騷分子「Go away」已經係好斯文，長毛就批評曾俊華有權有勢不理弱勢，回敬佢一句「Go to hell」。
父母教落 一定要鬧
鬍鬚曾噚日喺網誌話，被「撒紙」一事，令佢諗起當年喺美國紐約留學時，街頭有各式各樣嘅衝突，有啲人表面惡，但查實只係揀明知唔會反抗嘅人找麻煩，以展示實力，批評呢類人令人反感。
鬍鬚曾話，當呢類爛騷不斷重複上演，街坊亦難免覺得煩厭，有時佢就會伸手推開對方：「斯文點就說句Go Away，若對方還要糾纏，有時候也要加上一句意思相同，但更直接、更能表達立場的『助語詞』。」呢句係咪粗口？鬍鬚曾冇講，只係話父母禁止佢講不敬說話，「豬頭炳」都唔講得，認為一句簡單回應已可，助語詞可免則免。
長毛就話，佢父母都教落佢，面對有權、有勢、有錢、唔理弱者死活嘅偽君子，一定要鬧。長毛仲要求鬍鬚曾，應該立即辭職，因為守財如命嘅佢，令到香港嘅長者生活得好慘：「我回敬佢，Go to Hell，I am not a hypocrite！（去死啦，我唔係偽君子！）」
李八方
mailto:[email protected]