Samsung旗艦機Galaxy S5開賣個多星期，廣告賣到「行」，銷情亦好似唔錯，而記者在先達就發現大部份舖頭的S5售價都比官方正價$5,998平得多，大多開價$5,180，最平甚至聽過$5,080，認真抵玩。不過有相熟的舖頭Sales就提醒要小心稱為「港水」的後門貨，佢話這些「港水」多數係由大行或電訊商平價流出，雖然名義上是行貨，但實際上可能冇行貨保養！Sales提醒各位買機前要Check清楚盒面要有行貨閃貼紙，盒底要有中港聯保貼紙，先係真行貨，總之各位小心。
另外，名正言順買水貨亦得，三禾電氣的韓版水貨到港後，售價逐步回落，現價$5,180，但韓版是32GB，比行貨的16GB還要多，同時亦多跟一枚電池及充電盒，其實幾抵玩。加上韓版水貨已有藍色，金色亦將於復活節假後到貨，多些配件又有得搶玩新色，絕對考慮得過。
