公民黨新星大狀余俊翔惡鬥建制派梁兆棠嘅離島東涌北區議會補選，下星期日（27日）投票嘞！據聞，公民黨最近面對對手唔少「騎呢招」，包括有人行到佢哋嘅義工面前，逐個咁影人哋嘅大頭相，好似恐嚇點相咁，又攞住本數簿mark低同余大狀握手嘅市民數量，用嚟做乜？公民黨話要問對家先知嘞。報稱無黨派嘅梁兆棠，近日獲大批建制派落區幫手，包括新民黨田二少、民建聯李慧琼，連工聯會冇乜人識嘅鄧家彪都要出動，睇嚟阿爺相當緊張，希望保住呢個因為建制派議員呃錢罪成而懸空嘅議席。一眾泛民嚟緊會接力撐公民黨，長毛噚日率先出動，民主黨涂謹申、工黨張超雄、教協葉建源聽聞都會現身打明星戰，齊撐「余大狀」。