噚日喺上海舉行嘅F1中國站賽事，咸姆頓輕輕鬆鬆由頭帶到落尾，老2又係佢嘅隊友羅斯保，今站又係俾平治玩晒。咸仔連贏3個分站冠軍之後，喺車手榜已經追到僅僅落後羅斯保4分，睇個勢應該玩埋下個月嘅西班牙站就可以登頂。但係力爭5連霸嘅維特爾就認真唔掂，一個分站冠軍都未攞過，仲要讓路畀自己個隊友歷斯亞度。
平治玩晒黑帝3連霸
開季頭4站都贏晒，其中仲3度包辦冠亞軍，今季嘅平治暫時有近幾年嘅紅牛影子；希望戰情唔會真係發展到好似之前咁悶啦。不過咁，目前為止都未見到有車隊有力挑戰平治，車隊積分榜上最接近佢哋嘅就係紅牛，不過歷斯亞度同維特爾今場都只係排第4同第5，遠遠不及平治。
相反，今季紅牛隊內競爭似乎仲好睇㖭。自從09年由紅牛二隊「升呢」上一隊坐正後，一路做大佬壓住當時嘅隊友韋伯，間接導致對方同車隊不歡而散；加上呢4年喺F1完全冇對手，勢估唔到今季佢成績倒退得咁緊要。今站比賽，可以見到維特爾依然舞唔掂架RB10，結果今次又慢隊友歷斯亞度成20秒先過終點。
「歷斯亞度好過自己」
不嬲好有性格，唔肯順從車隊指令嘅維特爾，開頭拒絕就範，不過車隊人員之後澄清歷斯亞度同佢採用嘅比賽策略唔同，最後維特爾都係乖乖讓路畀隊友爬頭。雖然賽前已經承認歷斯亞度目前表現好過自己，但貴為4屆冠軍兼有「新車神」威名，連續兩站比賽都收到「柯打」要讓路畀年資尚淺嘅隊友，維特爾應該百般滋味在心頭喇；唔知佢掛唔掛住𠵱家揸緊「波子」玩耐力賽嘅韋伯呢？
