李雨陽入行11年，曾與無綫簽下一年一騷的坎坷條約，因生活拮据被迫到時裝店做兼職售貨員賺外快。如今35歲，李雨陽前年與香港電視網絡（港視）簽約成旗下合約藝人，原以為事業露曙光，豈料政府不斷搬龍門阻發牌，快將失業的李雨陽惟有自求出路，去年底與世叔伯合資售賣原味雞，日前到觀塘街市擺檔，大叫大嚷吸引師奶街坊幫襯買雞，放下藝人身份，毫不羞怯。
撰文：嵐山
身高6呎3吋的李雨陽（Eddie）日前到觀塘一間凍肉舖擺檔，他推着鐵轆車先由附近寫字樓步行到街市，首先派發宣傳單張，之後親自煲水將原味雞翻熱、切件讓街坊試食，他琅琅上口說：「原味雞，冇激素、冇防腐劑，有品質檢測。」引來大批師奶、阿伯和小朋友試食，數分鐘已有太太認出他，並幫襯買雞。Eddie說：「𠵱家我哋有幾個試賣點，每朝8點至下午2點都會落場幫手推銷，凌晨2、3點又會去包裝線睇吓啲雞質量，力不到不為財。」
Eddie自言不怕捱，但做演員很被動，過去嘗過不少冇工開的日子，09年被影到在尖沙嘴一大品牌時裝店做兼職售貨員，他解釋：「試過一年一騷搵千幾蚊，除開每月百幾蚊，日日望天打卦。冇收入，啲錢唔會自己跌落嚟，我又唔係富二代藝人，咪去搵份兼職做sales，試過撞到同行藝人，佢哋會問係咪私佣，如果係以後落嚟幫襯我買。當時有啲尷尬，要自己調節（心情），都要食飯㗎。」
轟無綫着數晒
Eddie痛恨與無綫的舊合約，覺得有很多不公平地方，他說：「規定唔可以去其他電視台，出去登台又要申請，又唔准講廣東話，乜都佢着數晒。冇工開就叫你去揸夜更的士，真係好洩氣。」
前年Eddie被王維基睇中，決心過檔港視，兩年已拍4、5部劇，每月有穩定收入，他說：「有人問𠵱家份糧係咪多好多？其實只係以前食樹皮都要同人爭，𠵱家爭得嚟有粥食囉，起碼有基本生活。」
可惜這口粥似乎不長久，港視不獲發免費電視牌，與港視餘下一年合約的李雨陽亦面臨失業，所以要積極在外尋求新工作，去年底與世叔伯合資賣原味雞，他自信發展潛力高﹕「我信有危先有機，𠵱家香港有禽流感，活雞檔又罷市，我哋代理呢隻原味雞更加有市場。我只係有三成股份，要將賺番嚟嘅錢放番落去再投資，有信心長做長有。」問可會再演戲？他肯定地說：「入得呢行，心中一定有團火，我對王維基有信心，信佢一定會搞得掂！」
