「有冇搞錯，六千八百萬喎﹗攞晒嚟派蛇齋餅糭，2016仲使選嘅？」「六千幾萬咋，做得啲咩啊？丹麥餅店個舖位仔都唔止啦。」六千八百萬，對我來說是一個天文數字，對朋友R來說，只值一單「刁」。對錢的概念，人言人殊，對政黨亦如是。民主黨、公民黨黨慶，絞盡腦汁，拍賣書法家作品、唐唐珍藏紅酒，苦苦籌得兩、三球。民建聯賣支中聯辦出品爛鬼長城干紅，已經打低佢哋成晚善款數字；仲未計張曉明幅低質字畫，賣到一千三百幾萬。大佬，黃曉明都唔值呢個價，更何況張曉明？
看着民建聯的吸金能力，泛民顯得酸溜溜的，但在百物騰貴的香港，六千八百萬又算甚麼？幸運的話，小市民一注獨中金多寶，也有個六千八百萬。廣西暴龍哥閒閒地買一個靚舖或者豪宅單位，也不止這個數。政府豪起高鐵香港段，一擲六百個億，落一場大雨延誤三幾日，超支已經不止呢個數。所以，不要把虛浮的數目看得太重，政黨籌得的經費，始終同表現掛勾。
我以前經常疑問，為何好端端的一個年輕人，進入建制容易語無倫次，放下良知指鹿為馬；但想一想這條富貴階梯，捱幾年一萬幾千人工的議員助理，聽教聽話就有龐大後盾撐你選區議會；幸運的話，三十出頭選埋個立法會，有蛇齋餅糭和旅遊車攻勢，如有神助，選舉工程易過借火。一朝飛上枝頭，手握區議會和立法會雙料議員合共百萬年薪，民主自由公義又算得上甚麼呢？唓！咁易做立法會咩？當你睇到克勤、樹根講英文，蔣元秋論政，你就發現尊貴議員們的個人質素十分之「親民」，價值低廉得觸手可及，對功利主義的後生仔女自然極具吸引力。
據報，民建聯去年收入破億，三年內增加六成，比很多優質上市公司表現還要亮麗。不過，香港有法例嚴格監管上市公司，卻沒有政黨法監察政黨。錢從何來，有沒有利益輸送，有沒有在地區和立法會表決上發生利益衝突，選民不得而知。學村口士多打麻雀的阿伯話齋，選咗出嚟都冇辦法，惟有信佢囉。有議員搵間夏威夷野雞大學，買個格林威治博士銜頭，攀附在一串廉價政治共同體上，𢭃政府糧的同時，還有政黨的蛇餅贊助，有時打打斧頭，其實大方的選民並不太介懷，總希望你有朝一日做做實事。
不過，得些好意需回手，凡事不要去得太盡，着數不能盡擸。審計署批盛事基金的報告，由商務及經濟發展局蘇錦樑局長擔大旗，建制盟友林健鋒為評審委員會主席，撥幾百萬公帑畀黨友陳鑑林搞龍獅節。呢筆胡塗賬，相信只是冰山一角，作為納稅人一定要清算。
講到呢度，泛民主派可能好同意，認為民建聯籌六千幾萬是「腐敗」。而其實，我不是不想批評泛民，只是你們太不堪，《歡樂滿東華》的卡拉之星的籌款能力都比你們強的時候，又有乜好寫呢？
唉，敢問路在何方？
Profile：
前新聞記者、主播，動物NGO工作者。現為自由傳媒人兼「另類生態學家」，透視傳媒生態、動物生態、社會生態。《反智動物》討論最高智商靈長類動物之種種反智行為。
