放假去邊好？一家大細個個喜好都唔同，阿爸想跑步、阿媽想野餐、大哥想飛車、細佬想盪韆鞦、細妹想周圍走，點算好？喺觀塘佐敦谷公園，就可以滿足晒一家人嘅願望。
佐敦谷公園位於清水灣道71號，總面積有大約6.3公頃，最大賣點係有一大草地，唔少人都一家大細嚟同陽光玩遊戲。
除咗草地，最特別係呢度設有一個國際級嘅遙控賽車場，男士們喺場外聚精會神，十幾架車喺場內風馳電掣，你追我逐。車場旁邊仲有個兒童遙控車場，今年9歲嘅伍俊曦喺場邊揸住佢架愛驅，表演一系列飄移、甩尾同轉圈等嘅高難度動作，俊曦老竇話，香港一爭呢啲咁正統嘅遙控賽車場，所以只要得閒都會帶埋阿仔嚟佐敦谷公園一顯身手。
喺大草地上，又點少得友共情。一班同學仔特意揀喺度搞預祝生日會，主角阿Jill話，一直想搵個地方野餐慶祝。「一定要大，草地要靚，同埋方便，側邊的配套都有關，例如近唔近地鐵站都會考慮。」佢仲話諗過去迪欣湖，但係比較遠，都係覺得佐敦谷一來喺市區，二來地方大、草地靚，就揀嚟呢度慶祝生日。
佐敦谷公園仲設有兒童遊樂場、長者健體園地、緩跑徑、戶外健身站、社區園圃等，想學種花嘅話，仲可以去公園裡面嘅園藝教育中心同溫室參觀。
交通︰
佐敦谷公園設有停車場，但只有42個收費車位(包括1個殘疾人士專用車位、33個私家車位、6個電單車位同兩個旅遊巴車位)，唔想排隊泊車嘅話，其實附近的紀律部隊宿舍亦提供時租車位服務！
公共交通方面，可以喺彩虹港鐵站外面搭54S小巴，喺總站紀律部隊宿舍落車，行3分鐘度就去到公園。
另外，九巴23、23M、91、91M、92、96R喺附近都有站。