香港兩大名店鏞記與福臨門之兄弟官司去年審結，鏞記大哥甘健成病逝，三弟甘錕禮掌控鏞記，大局已定；福臨門方面，五哥與七弟分產，香港福臨門歸老五所有，境外（包括中國大陸）之福臨門歸老七經營，至於邊一個佔咗着數，好難講，到第三代全面掌舵之時，自有分曉。
福臨門老七，人稱七哥，就係徐維鈞先生，幾個月前，佢在杜老誌道羣策大廈開設「家全七福」粵菜店，以福臨門家傳菜式為主打，歡迎新知舊雨到場試吓新店手勢。呢晚徐先生（下稱七哥）請幾位朋友試菜，未上菜前，左丁山問佢經營狀況如何，佢話在香港經營食肆，從來不易，總要經過一番掙扎，以佢自己為例，十四歲就俾爸爸睇中，叫佢唔好再讀書，跟住爸爸出出入入，做爸爸助手，五哥就可以讀書，放洋深造。當年福臨門係做到會為主，經常到九龍塘紡織大亨嘅大宅到會，煮三四圍酒菜，又不時到山頂、半山區到會，每早就要去中環街市買菜買雞買魚等等，爸爸教落，買賣要行先，所以七哥每每在中環街市開門前半小時就到咗街市外面等，第一個衝入去買靚海鮮，到了晚上，就在富豪大宅幫爸爸入廚煮餸，所以七哥話：「我真係學到十足十，一腳踢，套功夫由頭到尾學晒。」
後來福臨門名堂響，索性在灣仔覓舖開業，爸爸六十歲宣佈金盆洗手不再下廚，七哥二十歲就接班擔大旗，點知一班老夥計就出外另搞一間搶走生意，令年輕七哥一時之間不知所措，與爸爸坐電車去中環街市，見到爸爸坐在前面暗自以手巾仔抹眼淚，父子幾乎相擁痛哭，七哥嘆息：「嗰陣時好辛苦，捱得左支右絀，好彩後來遇到知音客，就係黃霑嘅姐夫屈書香先生，佢住在跑馬地，係著名食家，請客時仍然唔怕我年輕，指定我去到會。我第一次坐正，全力以赴，飯後，屈先生走嚟拍我膊頭講句，『太子，你係得嘅！』唔止咁，仲周圍讚我好嘢，於是爸爸啲舊客逐漸返晒嚟，生意越嚟越好，之後就冇乜大風波嘞。我到今日還是要多謝屈先生。」哦，冇真功夫，又冇人肯讚你嘅。即自助者天助，此之謂也。