睇《足球小將》長大嘅你同我，總會試過幻想自己成為其中一分子吧，你最想做邊個？戴志偉、小志強、林源三定樑仔？我最愛嘅反而係泰萊喎，佢唔算係主角，唔係最搶鏡嘅球員，但往往響重要時刻，佢就出現，仲做埋救星㖭。
細細個睇泰萊時，成日替佢唔抵，覺得佢應該可以坐正做1哥，但大個啲之後就明，有時做阿二其實仲舒服，壓力唔使咁大，大佬有難時先挺身而出，掌聲一樣咁多。
周中嘅加里夫巴利，就以7.04秒跑咗59.1米去完美演譯咗一個超級阿二嘅角色，好多人話佢呢招ball out由球場外跑返入球場內、自己畀自己嘅招式非常葵新伍，但考慮到基斯坦奴朗拿度缺陣，而對住美斯壓陣嘅巴塞隆拿，呢場決賽巴利確實係泰萊上身，響最需要你嘅時候，你就出現嘞。在冇耐之後當大佬回歸，佢又會淡淡然淡出，非常之瀟灑。
今屆嘅各地聯賽爭搏，邊隊有一個超級阿二泰萊在陣，就會有機會攞到冠軍，唔係話大佬唔重要，而係各位大哥總有頭暈身㷫嘅時候，球隊有冇穩定嘅表現，就決定於二佬嘞。當皇馬有巴利，巴塞原本呢個第2攻擊點火力更強，點不知尼馬唔覺意俾人封咗個「插水王子」稱號，火力大減，同美斯攬住淪落；至於一鳴驚人嘅馬德里體育會，不能不服施蒙尼，晨早趁低吸納韋拿做球隊泰萊，同迪亞高哥斯達拍住上。
英超場面不遑多讓，有泰萊就有機攞冠軍，曼城原本有好多個阿二，但選擇太多冇個上到位；阿仙奴原本都有，但約埋一齊養傷；車仔無謂講阿二嘞，根本上連一個戴志偉都冇；咁所以當利物浦橫空騎上榜首位置，大家一啲都唔意外，當然蘇亞雷斯今屆做硬甚麼甚麼球員先生，但若果唔係有史杜列治呢位黑泰萊，響蘇七缺陣時密密做嘢，謝老四又邊有得哭着笑呀！
KEYMAN
now TV主持