近年影壇中有條黃金方程式，只要林超賢執導加上張家輝主演，電影大多叫好叫座，其中《証人》令家輝成為影帝，《激戰》也為他登上今年香港電影金像獎最佳男主角寶座。二人樂於這長期合作，觀眾亦喜見他們每次不一樣的化學作用，於他們最新合作的新片《魔警》中，家輝雖佔戲不多，但演出依舊搶眼，難怪他日前於訪問中也不怕「肉麻」的表示林超賢是最明白自己的人；而林超賢亦不諱言，與家輝如此投契及一拍即合，可能是大家也曾經歷港產片的爛片時代。
撰文：文國駿
香港現已上映
張家輝及林超賢日前接受本報專訪，為電影《魔警》宣傳。即使當日並非身處片場拍戲，但二人在訪問後拍照期間，齊齊chok爆擺甫士玩到盡，十足大細路，非常有默契。其實林超賢與張家輝已合作多次，首次是於01年拍攝的《走投有路》，林超賢憶述跟這最佳拍檔首天拍攝的情景，他坦言：「嗰陣其實係港產片幾艱難嘅時期，可以話係爛片時代，我開工見到家輝，心諗佢咪又會覺得橫掂拍喜劇啫，咪又係喺片場交行貨。點知第一日開完工就完全改觀晒，佢同我一樣係好認真，每個場口都度到盡，開始覺得，呢條友啱傾喎。」家輝表示跟林超賢的首次合作，令他有遇上同道中人的感覺。
無言默契
問到林超賢與家輝已經合作多次，火花可有減少？他謂：「有啲人會覺得合作好多次可能冇晒新意，但我就唔係咁諗，越合作得多只會越有默契，有默契就可以更快有共識，令到拍攝更順暢，而我同家輝默契好到不得了。」於影壇浸淫多年的家輝，到08年遇上林超賢的《証人》才一嚐影帝滋味，他表示林超賢是最明白自己的人：「我本身同林超賢好老友，佢係最明白我嘅一個人，佢知道喺現場點樣可以拍到我最好嘅一面，所以我同佢合作咁多次都完全冇問題，好有信心。」
談到《魔警》，香港人第一時間便會想到06年發生的徐步高案件，林超賢表示：「起初個構思諗法當然係由呢件案件帶起，但我唔係想講番呢件事，而係想探討吓人點解會成魔，好似戲入面吳彥祖咁，佢係咪真係一個咁壞嘅人呢？」戲中的因果論意味甚重，林超賢坦言因果是一個他常常希望談及的主題：「好耐之前已經想講，但一路都唔啱時候，有時啲嘢你以為做咗冇人知？其實係會跟你一世，只係睇吓嗰點幾時先爆發，冇人避到。」
良知盡失
對於家輝在電影中戲份不多，林超賢加以解釋：「當度好晒個劇本時，我希望有人可以演得出嗰份令人不寒而慄嘅感覺，我第一個即刻係諗起家輝，咁結果當然冇令我失望啦，角色戲份唔係最多，但係非常重要。」而家輝亦坦言沒有介意戲份多寡：「首先我對個劇本同角色都好有興趣，其次係就算個角色係帶足全場又好，得一場戲都好，我都係咁演嗰場戲㗎啦，我唔會因為戲份少就留力，都係咁做！」對於飾演壞到底的奸角，家輝坦言非常過癮：「反派嚟講我都未試過壞到咁盡，以前演嘅梗會有番少少良知，呢個都係新嘗試，都幾過癮！」
林超賢把戲中主旨定為「人心總納一點黑」，問到二人心中的黑是甚麼？林超賢謂：「話明係心底，當然唔可以拎出嚟講畀你知，但最重要係你要控制嗰點黑，而唔係俾佢控制到你。」家輝笑言：「我嗰點黑就係揸車時見人揸得慢會好𤷪，會好想鬧人，我平時都唔會係，係揸車唔知點解就會咁。」