籃球鞋系列AJ唔經唔覺出到29代，米高佐敦周五仲親自出席紐約舉行嘅新鞋發佈會。今次AJ XX9有兩個賣點，除咗特別嘅緩震系統，就係功能性編織鞋面，着住佢就好似度身訂做咁貼服。新鞋今年9月先推出，不過雷霆後衞韋斯卜克身為代言人之一，當然試着過，睇怕「二少」都會喺對灰熊嘅季後賽率先以新鞋參戰。