【本報訊】出爐「枚后」Anita，年輕時在尖沙嘴酒吧街叱吒一時，有「出位姐」稱號，她憑着一雙手贏盡掌聲，如今則用來洗衫煮飯贏了丈夫回家。在財拳壇上退隱15年後，Anita重出江湖參賽，當年名利已化浮雲，她贏獎金後只想「等屋企人得閒就去旅行」。
丈夫亦是手下敗將
重遊尖沙嘴漆咸圍舊地，Anita不住回想八十年代在漆咸圍酒吧任職拳手的點滴。「做拳手要猜財拳，我初出道酒量差，半枝啤酒就不省人事，唔想醉咪苦練囉，練得多就識捉路，加上反應快好易贏人。」
Anita很快猜出名堂，酒客均以打敗她為榮，高峯期七間酒吧爭相招聘，月入高達兩萬元以上，以當年薪酬來說相當不俗。「有一晚我唔飲得酒，個客話猜錢，我贏就收七折，輸就賠十足；個晚啲客排住隊嚟猜，結果個個輸哂，贏咗7,000蚊，實收4,900！猜到出晒位，啲客開始叫我出位姐，反正我𠵱家都未遇過我輸梗嘅人。」Anita說時淡然一笑。
財拳壇上無人能敵，現任丈夫亦是她手下敗將，不過她敗在丈夫的柔情蜜意，93年婚後便退隱江湖，洗盡鉛華後滴酒不沾，只用雙手為子女洗衫煮飯買餸，直至08年與朋友聚會飲酒，才開始重拾猜財拳的樂趣。