江若琳下月初與寰宇的十年死約結束，有指她決定離巢外闖。奉獻了十年青春，對她來說有得有失，最近有報道指江若琳突然向公司發律師信解約，並指江若琳不時要公司墊支，去年中老闆林小明才給她50萬，但料不到這筆錢令賓主昨日隔空開拖。
江若琳指藝人表面風光，平日化妝、髮型和租車等雜項甚多，最終真正落袋少，江若琳昨日在電話中說：「當日50萬係林先生（林小明）提出，我十年裏賺錢超過千萬，一毫子都冇收到，呢十年媽咪好擔心，見我捱更抵夜咁工作都冇收入，多次向公司提出疑問，點解十年可以零收入。林生提議不如將50萬放喺我銀行戶口度，咁我可以同媽咪交代我係有收入。林先生主動提出借我50萬，但我媽咪以後唔能夠再干涉我任何工作。」
經過半年，問到江若琳是否花光那50萬？她說：「一蚊都冇動用過。」50萬到底是薪酬還是墊支？她說：「我好難界定，我10年冇收入，每月靠公司墊支生活費，全部要還。」江若琳拒透露每月獲公司墊支金額數目，下月約滿仍欠寰宇一筆欠款，她說：「涉及金錢嘅嘢，我交咗畀律師處理。」
「靠公司墊支生活費」
寰宇老闆林小明指江若琳合約下月未滿，他昨日回應：「江若琳同寰宇簽咗15年約，十年死約，其餘五年係由公司決定續唔續，如果要續，藝人本身係無權反對，佢𠵱家突然畀封信要解約，我哋唔同意當然解唔成，公司用咗資源去捧佢，𠵱家好咗就話要走，係咪好唔尊重合約精神。至於畀佢阿媽嗰50萬，係因為我同佢傾15年約滿後，再加簽五年，佢就話想阿媽可以安心，所以就要求我墊支50萬畀佢阿媽揸手，佢將件事講成咁，我有啲嬲。」
採訪：陳杰