優質旅遊服務協會噚日上演咗一幕「999誰是兇手？」，事緣新屆協會剛選出，同傳媒見面時，嚟自零售飲食界嘅委員最關注，邊個係推高租金嘅元凶？
作為飲食界立法會議員嘅協會顧問張宇人先出招，講笑話：「租金好貴，好多餐廳都要搬，最後都變咗化妝品店囉！呢樣嘢問太興老闆陳永安最清楚。」協會副主席陳永安就笑笑口：「租貴好難做，但搬到樓上舖都幾好吖，地方都大啲！」
周梁話禍首係政府
今屆主席就係莎莎老闆郭少明，聽附近張宇人咁講臉色一沉，但笑住回應，「我哋好多舖都被迫搬到樓上㗎！」佢話好多年前喺尖沙嘴舖租每月25萬，當時行家都話佢黐線，但之後舖租越嚟越貴；佢喺銅鑼灣羅素街嘅舖位月租最初只係40萬，但之後業主加到幾百萬，「我哋最後都要搬到樓上」。郭生突然望望隔籬太子珠寶鐘錶執行董事朱繼陶，講笑話：「間舖咪俾鐘錶舖搶咗囉」。
眼見個波拋到過嚟，朱生好淡定咁話：「其實真正推高租金嘅係另有其人」。傳媒、委員都屏息靜氣望住呢位「福爾摩斯」。佢話佢哋只係做代理，部份分店都因租貴搬到樓上；真正唔介意貴租嘅查實係國際鐘錶品牌，佢哋直接喺香港開店，由於成本係全球計算，就算香港店租金天價，都可以拉上補下，「搶郭生間舖嘅都係佢哋呀」。資料顯示，莎莎羅素街分店後來就係俾名錶OMEGA以逾900萬元月租搶咗。
國際鐘表品牌並唔係協會成員，唔喺現場冇得反駁，就咁成為「真兇」。不過，名譽顧問周梁淑怡總結話罪魁禍首其實係政府，因狼振英政府一直忽略咗商業用地，「舖位推高晒租金囉」。
查實如果冇咁多自由行，香港就唔會逼爆，小店就唔會被趕絕！
莎莎、太子珠寶都唔使被迫搬上樓上舖啦，不過，八方心諗，呢班零售界人士寧願被逼囉！
mailto:[email protected]