消委會前總幹事劉燕卿重出江湖做申訴專員，噚日首次見記者，佢話其實退休離開消委會之後，一直有唔少公營、私營機構搵佢過檔，連內地機構都有，但係佢最終揀做申訴專員，因為申訴署公信力夠高。
咁又係嘅，唔通去加入毫無公信力嘅狼振英團隊咩！
話唔怕權貴
但係聽聞唔少高官私底下非常唔妥申訴署，做申訴專員隨時得罪唔少權貴。劉燕卿就話佢日後絕對不會手軟，就算識得都冇面畀。佢又話其實消委會以前都俾市民去申訴署投訴過，佢覺得公署處理得好公正，會畀建議你改善，就好似去驗身一樣。
佢又話出任專員後其中一個新方向係要精簡投訴處理程序。公署收到嘅投訴，大部份都係輕微同唔涉及行政失當嘅，公署以前要先同被投訴部門聯絡，收到回覆後，又要寫報告回覆投訴人，需時幾個月，今後佢哋會盡量同步叫部門直接回應投訴人，如果唔滿意至再跟進，咁樣處理時間最多可縮短一半。公署亦會盡量推廣投訴雙方用調解方式去尋求雙贏方案。精簡程序慳番嘅人手，就可以用嚟做多幾宗主動調查。