港視主席王維基（圖）噚晚出席話劇「你為甚麼不是Steve Jobs?」嘅講座，同導演鄧樹榮討論創意。王維基同佢識咗幾年，好恭敬咁稱呼佢做鄧Sir。魔童又自爆話，本來報咗名參加詹瑞文個PIP表演藝術工作坊，不過最後都係唔得閒去。
維基出晒名有冒險精神，佢話政府越打壓佢，越激發到佢嘅創意。佢平時除咗玩毅行者，同鯊魚潛吓水，原來早幾年買咗部鋼琴返屋企學彈歌仔，點知冇耐就開始搞電視台丟低咗。佢諗住搞完電視台會學返琴，佢話「人生就係要玩盡所有嘢，我差在未學芭蕾舞」。
維基對仔女都喺外國讀書，𠵱家個女對宗教同哲學好有興趣。佢鼓勵學生哥讀多啲歷史同人體科學，捉棋就可以訓練沉着應戰嘅修為。呢一年，魔童嘅事業經過大起大落，除咗激發到佢創意，相信佢修為亦增進唔少。