雖然民主黨涂謹申（圖左）冇參加第一波爭取真普選絕食團，不過上星期佢就為全世界受飢餓之苦嘅人，捱餓捱咗30個鐘，一樣好有意義。除咗阿涂之外，食物及衞生局局長高永文（圖右）都有參加上星期嘅饑饉三十，阿涂仲晒出佢哋嘅合照，不過張相就凸顯咗高永文個肚腩囉。
其實阿涂年紀都唔細，有小肚腩都好正常，但係佢相當醒目地抱住自己個仔信之（圖中）嚟影相，喺信之嘅掩護下，阿涂個肚腩只係若隱若現，反觀無遮無擋嘅高永文，仲要着住件Tee恤呢啲極易曝露身形嘅衫，成個肚腩當堂凸晒出嚟。睇嚟高永文要多啲參與饑饉，乘機當減肥喇，當然佢肯為真普選而絕食就更加歡迎啦！