舊年碼頭工潮，香港國際貨櫃碼頭公司（HIT）話上咗寶貴一課。好似早排HIT做問卷調查，外判工友反映冇啖好食，成日叫外賣，又要喺碼頭食西北風。HIT決定回應訴求，開放員工餐廳畀外判工友。雖然八方唔明點解以往唔畀外判工使用，硬係要劃清界線，但都叫從善如流。
不過有工友話，日日忙到飛起，落機食飯又冇飯鐘錢，寧願叫外賣，睇嚟HIT都要諗諗工時問題。HIT早前公佈調高外判工底薪6%，連同額外績效收入4.1%，總增幅達10.1%，已經有99%工友接受加薪安排，早前亦舉辦五場簡介會，講解績效計劃詳情，下月會公佈有關數據。