上季玩完馬後炮，今季就做預言家，同大家一齊睇吓嚟緊周末有咩好睇。
題目：曼聯中場點執好？
尋找史高斯接班人尋咗好多年都未搵到，到𠵱家連卡域克接班人都唔覺有。自從夏格維斯後，費格遜一直唔買一流中場，直到今季莫耶斯先搵嚟舊部費蘭尼曼聯中場斷層呢個問題拖咗咁多年，係時候要解決。
卡域克年紀大，今季表現走下坡，費查大病初癒，下季都唔適合擔大旗，而湯卡華利就越踢越差，仍然孭唔起隊波。由年齡、球員質素同埋身價嚟睇，費蘭尼肯定係莫耶斯心目中嘅正選中場，問題係佢差個好拍檔。
費蘭尼身材高大，雖然慢咗啲，但佢好鍾意走上前助攻，防守算唔錯，靠身位都搶到波。因此，曼聯嘅新中場一定要補足到費蘭尼嘅缺點，即係要靈活，防守要有位置感，跑得走得，最好有腳準確嘅長傳，簡單啲嚟講，係要個體能加強版嘅卡域克。莫耶斯想買卻奧斯，相信就係睇中佢嘅長傳能力，但卻奧斯踢防中，略嫌位置感差啲，就算喺拜仁，佢都要拿姆或者舒韋恩史迪加拍住佢先踢得好。
費蘭尼嘅踢法偏向進攻，假如搵個同樣攻強守弱嘅卻奧斯返嚟，曼聯中場攔截能力會出問題，所以小弟建議莫耶斯不如吼吓多蒙特嘅施雲賓達、利華古遜嘅拿斯賓達、史浩克04嘅紐斯泰達。呢幾位德國防中雖然個名冇卻奧斯咁響，但勝在實而不華，跑動範圍大，攔截唔錯，可以令曼聯條中場硬淨起嚟。唔敢奢求要個好似堅尼咁強嘅全能防中，只求有個達到費查當打時咁嘅新兵，已經可以令曼聯挺起腰板踢波。
文：咖喱