上季玩完馬後炮，今季就做預言家，同大家一齊睇吓嚟緊周末有咩好睇。
題目：曼聯中場點執好？
香港電影金像獎周日完滿結束，《一代宗師》成為大贏家，《激戰》同《狂舞派》都有合理回報，但個人覺得《掃毒》被低估；陳木勝先生係小弟極欣賞嘅導演，由《天若有情》一鳴驚人，到《衝鋒隊怒火街頭》、《新警察故事》、《三岔口》等都非常精采。《掃毒》中心思想係講兄弟，就算經歷幾多風波，兄弟始終係兄弟，有咩危難都會幫你擋子彈。
曼聯歐聯8強止步，就算最後上番前6有歐霸盃資格，都係一個失敗球季，領隊莫耶斯當然係眾矢之的；未到休季，曼聯已經有好多買賣消息，除咗球員，連領隊都有份，傳聞多蒙特教練高路普接手，不過點都好，名義上莫耶斯仲係紅魔現任領隊，諗擴軍人選都係以莫耶斯品味做依歸。咖喱話紅魔最需要喺中場擴軍，唔係呀嘛，曼聯中場線已經頂級啦，唔計朗尼墮後，桑馬達、費蘭尼、拿尼、香川真司全部國腳級，人才濟濟，只係莫帥唔識用。相反中堅方面，維迪已經落實下季去國米，里奧話走又話唔走，不過佢留隊都冇咩作為，菲爾鍾斯係好努力，但我覺得佢適合打防中多啲，伊雲斯同史摩寧？咪玩啦！
莫耶斯就好似《掃毒》裏面嘅古仔，只靠昔日兄弟，要搵中堅，梗係向愛華頓埋手；莫帥其實都好有拖肥糖情意結，好似教練團嘅菲臘仔咁，都係喺愛華頓過嚟。莫帥都講過，叫里奧學吓菲臘積基爾卡，既然係咁，梗係向愛華頓買呢個英格蘭中堅，積基爾卡都已經31歲，相信叫價唔會太高。如果嫌唔夠兄弟多，不如買埋奧士文、賴史密夫、迪斯甸，咁就一家團聚嘞！
文：牽牛