麥當勞再推「麥趣飯」，雖然主菜同樣係雞肉同牛肉，但一年過後加價近一成半，餐售價由28蚊加到32蚊，今次以「韓汁」取代「燒汁」，睇嚟經過韓風加持，食物都賣貴啲！
麥當勞上年4月首推「麥趣飯」，分別有「燒汁牛肉」、「板燒雞」兩款口味。麥當勞噚晚六點起再推新款韓汁麥趣飯，主菜同樣係雞肉、牛肉，化身為「韓汁薄切牛」、「韓汁板燒雞」，套餐售價由上年嘅28蚊加到32蚊，加幅近一成半。
至於同樣喺舊年推出嘅牛肉「麥飯卷」，同樣加入韓汁，同另一款維持舊脆雞口味嘅麥飯卷，套餐售價雙雙由舊年28蚊，加至30蚊，加幅約7%。麥當勞冇正面回應加價，只係話今次加咗新產品為顧客提供新鮮感、選擇。