香港電影金像獎，《一代宗師》橫掃獎項，但因為最近「本土」意識提升，以至章子怡和張晉即使奪魁而歸但幾乎背脊骨落，結果網民條氣唔順要自選他們心目中的最佳乜物獎。本來，「One man's meat other man's poison」你視為寶，他人當草，同一道理放諸藝術觀點亦行得通，尤其時下動不動興講「XX嘅嘢，你識條seven咩？」真是人人都可指手劃腳，識上社交網絡都是判官。你可以唔like《一代宗師》，你有權唔想大陸人攞獎，但如果是基於所謂「鋤強扶弱」純為撐本土而撐的心態，我只能告訴大家一個本來不能說的秘密，就是，我們都搭乘在同一艘將沉的豪華郵輪。
《我是歌手》曲終人散，火紅得香港兩個電視台都有轉播，更有無數歌迷為阿G.E.M.鄧紫棋網上加油，相比起大半年前佢因一句「叫特首加油」時備受的謾罵何止十倍奉還！當大眾齊讚這個節目水準之高，本地電視台十年拍馬追唔上，local歌手冇幾個有名氣兼有料唱到如此水平之時，老實講，如果《勁歌金曲》是個爛到出面的舊橙，那《我是歌手》都只不過是包裝贏晒「金玉其外」的壞柑。你看上節目的歌手都必須有萬能key的條件，如果具備有「強音爆咪」就升呢有望，大夥觀眾亦朝着相同方向去對待此事，你看不斷有評判和觀眾聽到O嘴和眼泛淚光的特寫，除了覺得做戲做得假，外在環境就是不斷向受眾灌輸「高難度」=「高水準」的欣賞水平意識。
本地劇壇圈亦有類同，常見某些劇目強調「一人扮幾十個角色」，「轉一個燈就換一個身份」，有觀眾甚至內行人視為演技至高境界，趨之若鶩，驚為天人，有此見識者亦足見其欣賞水平不過了了。實不相瞞，我個人首本戲《死佬日記》就屬這類型的演出，但多年來無論觀眾如何讚譽，我個人始終認為，這不過是專業演員最基本的要求，只是「工匠」順手沾來的作品，有幾巴閉？
無論歇斯底里爆咪，抑或精神分裂地轉換角色，當然都講求高度技巧和經驗，但努力表演是手段，而非藝術的目的，大眾如果認同高難度與高水準掛鈎，情況就有如列入亞運項目的那類講求大動作多跳躍為求花巧難度、埋沒真正武道拳理的所謂「武術」一樣，都是枉費多年苦功去追尋得來的空架子，完全沒有實際作用，更遑論攀得上武道真義的高牆。
大家如果追求「亮點」就等同「卓越」而不自知，這才是悲哀。
【一言棠】
撰文：歐錦棠
除表演藝術，也酷愛文字、影像及武術，其文章往往一針見血。
本欄逢周五刊登