【自保方法】
現時全港有3,200部銀行櫃員機，供市民提款、存款，甚至交水電費一腳踢，不過假如㩒機時出少錢或出錯錢，小市民可以點做？
記下機號向銀行投訴
大律師陸偉雄提出「自保」四招：（1）將取得的鈔票即時向閉路電視展示以作紀錄，雖然閉路電視未必能清楚攝下鈔票編號，但這是「顯示一個姿態俾銀行睇，有突發事故，因為正常提款唔會無啦啦做出呢啲舉動」；（2）抄下櫃員機編號；（3）向銀行投訴；（4）要求銀行查核出事櫃員機近期故障紀錄。
陸偉雄又指，市民未能從櫃員機提款，屬銀行責任，若市民提款拿不足錢卻又未獲賠款，可考慮經小額錢債審裁處向銀行追討。
他認為「要深入投訴，銀行先會認真處理」。金管局亦提醒市民提款後應即場點數及列印單據作參考，若發現櫃員機出款數目不符，應立即聯絡銀行跟進。
市民許小姐認為小市民很難與銀行討價還價，銀行拒賠亦無可奈何，惟有「每次㩒錢㩒少啲，咁俾銀行食錢都冇咁蝕」。陳先生則指「人人都存錢入銀行，呢件事銀行一定要向公眾交代」。
《蘋果》記者