電影《竊聽風雲3》噚日喺網上推出咗條1分鐘全新嘅預告片，呢次內容唔再講基金、玩股票，而係用一直都好受爭議既「丁屋」做題材，講劉青雲、方中信、林家棟同埋林嘉華四兄弟，點樣買賣丁權嚟賺錢，片段仲用咗聲波紋效果，俾人一種「竊聽」嘅感覺。
對白夠激
點知好戲在後頭，對白比畫面更加吸引，擺明要幫有本土特色嘅港片爭番啖氣！片段一開始聽到曾江話：「香港地少，如果好似以前咁起丁屋，就係浪費地皮，對香港好多市民都唔公道。」講完公道，又睇到羅蘭飾演嘅村民，點樣畀一班土豪逼害，成班村民好盡力咁保衞自己嘅家園；但轉過頭又講一班土豪，點樣計劃收更多丁權，可以賺多啲錢，喺預告片尾段，林嘉華仲用番前年車公嗰句籤文「何謂邪鬼何謂神，神鬼如何兩不分」作結尾！
除咗預告之外，仲有多張海報同劇照曝光，一張以劉青雲、方中信、曾江、林嘉華同林家棟組成嘅香港土豪海報，同另一張以古天樂、吳彥祖同周迅組成嘅村民海報，對立陣營真係好有氣勢，海報之中仲有一句金句去表達佢哋嘅角色，土豪嘅金句係：「我們擁有香港最多的土地，我們的目標是：走出新界，稱霸宇宙！」而村民嘅金句係：「我們擁有屬於自己的生活，我們的底線是：保衞家園還我河山！」呢套戲喺6月會上映，睇到啲對白嘅敏感程度，可以預計套戲會有幾吸引！
撰文：馮仁昭