近年唔少大隻新股，招股時講到天花龍鳳，但上市後表現卻貨不對辦。當下咁嘅市場氣氛，再用正常推銷策略，上唔到市㗎喇！綜合市場人士意見，海迪總結到幾招賓架近年常用的保上市「招式」：
一、扮抵賣：首先為隻新股pre-marketing時，研究報告就定到估值好高，到路演正式定價時，先還原真正意向價，形成「好抵」效果，但又會否認「減價」；二、擘闊招股價：招股區間定到好闊，咁賓架就可睇定啲個市況再行定價，增加賣出機會；三、玩語言藝術：發明「anchor investor」（固定投資者？）。所謂anchor investor，沒有禁售期，買賣條款不會落招股書，亦可隨時抽飛，和一般入飛機構投資者分別不大，但這名號就方便賓架向客人放料，營造新股有猛人垂青效果；四、靠朋友：有某行業的新股，近年開始「叫自己債仔去認購自己」。如某內銀股就搵向自己借錢客仔認購。某些客仔擔心會被斷水喉，故此會就範。新股招股時所謂市場消息總是滿天飛。白字黑字寫低的值得參考，但太多如寫小說般的情節，就無謂太認真了。
海迪