多年前，一班教育朋友要在公屋、私樓、居屋混雜嘅新區，創辦一間非牟利幼稚園，辦學宗旨係為該區幼兒提供優良學習環境，但成班讀書人加加埋埋，唔夠錢開辦噃！點算？於是搵左丁山呢位市儈人士諗計，左丁山根本唔識辦教育，但識得睇數，問過晒啲成本（租金、水電煤、教師人數、薪資、校工、雜費等等）及收益（學費、雜費、活動費）之後，唔使用Excel，用計數機已經計到係一盤必賺生意，最怕係冇學生嚟讀箒，但原來客源（學生）係最容易搞掂嘅，佢地驚都未驚過，左丁山於是教佢地向校友、朋友借錢，每人借十萬左右，分十年償還，定額利息五厘。不過教育界朋友好清高，唔贊成舉債，最後還是用最傳統方法，說服一位有錢朋友捐款（開辦費、設備費），順利搵到商場租舖開學，收區內最低嘅學費。不出所料，兩年後已有累積盈餘儲備近二十萬元，管理委員會揸住筆錢，並無用途，唔知點好，於是決定維持最低學費直至某年入不敷支為止，要加學費為止。
左丁山於是知道辦幼稚園原來好好搵，係財路一條，不過自己無意辦幼兒教育賺錢，知道就算。近日得知天水圍嘉湖山莊二期有一間德怡中英文幼稚園，有學生近600人，在商場租校舍，本來月租26萬5千元，最近租約期滿，業主置富產業信託（上市編號778，Fortune Reit，做價約6.15，息率5.85%左右），估唔到有同行（英藝幼稚園）出更高價（傳聞係59萬元，比原租高出122%）爭過，既然係上市公司租地方俾牟利公司（德怡與英藝都係牟利幼稚園），當然係價高者得，否則當事人會俾人告上廉署都似，咁就鬧出小風波啦，德怡幼稚園家長去信長實，名作家張堅庭在am730專欄單打長實及李先生：「誰窮得只有錢？」在在顯示出某些人諗嘢不經大腦，只求情緒發洩。首先，置富（778）嘅大股東係新加坡上市公司ARA，呢間公司嘅大股東係Straits Trading Company（佔20.1%），次股東係ARA行政總裁林惠璋（佔19.25%），三股東係一個投資基金（佔10.06%），頭三名股東已佔ARA49.41%股權，長實只佔ARA7.84%。長實及和黃另佔置富28.16%，所以咯喎，根據上市公司管治系統，長實對置富之日常管理應該不加意見，留番俾ARA及置富話事，批評者唔好窮得只剩下把口呀！