43歲大美人李嘉欣靚足20年，今天依舊美麗，平日做運動、學畫畫，養尊處優，只為兒子、老公團團轉。李嘉欣早前一張湊仔沖涼的泳衣相，引來大批網民激讚身形好，另一張自拍照則被發現稍現魚尾紋，嘉欣笑面回應，「冇人可以改變歲月留下嘅痕迹，保持自信開心就夠。」凍齡有術，年輕靠自信，李嘉欣樂做美魔女。
採訪：林妙萍、鄧卓嶽
撰文及造型：鄧卓嶽
攝影：郭賢興
李嘉欣在中環做專訪，埋位拍照，三兩下功夫完成，全因為爭取時間湊仔。自從和許晉亨所生的寶貝仔Jayden Max出世後，嘉欣的生活總是圍着兒子轉圈。Jayden是獨子，有想過趁早為他追個弟弟妹妹？「都有幻想若果多個小朋友，應該會好開心，但係成日俾朋友笑我，話𠵱家照顧Jayden已經剩番半條人命，再多個就可能冇命，所以都係留番啲精力照顧好佢先。反正Jayden有表哥陪佢玩，兩個好似兩兄弟咁，加上我覺得其實佢想要晒我所有時間。」照顧家庭已佔了全部時間，更遑論復出拍戲，「我從來都冇講過退出，只不過比起拍戲，我𠵱家更鍾意做自己生活上的角色。」
精神時間都投放家庭上，嘉欣自言教育孩子的職責比拍戲更辛苦，「有啲家長會同小朋友扮演good cop、bad cop，我覺得要做right cop先啱，黑臉白臉都做，我同老公會因唔同時間交換角色。」自小入娛樂圈，他日Jayden若說要當藝人，又會同意嗎？「冇諗過咁遠，𠵱家淨係想畀多啲空間佢開心成長，第時如果真係想入行，我都可以分享我嘅經驗。」
自信魚尾紋
現今個個凍齡有術，美魔女大行其道，嘉欣亦樂於接受這稱號，「我諗都算係一個正面嘅稱呼，𠵱家市面上有好多人容貌保養好好，就算40、50、甚至60都唔怕，最緊要是保持年輕嘅心態。」早前微博一張自拍照被網民發現臉上稍現魚尾紋，嘉欣笑面回應，「冇人可以改變歲月留下嘅痕迹，aging唔係問題，保持自信開心就夠。」識英雄重英雄，大美人眼中的美魔女代表又是誰呢？「我會揀鍾楚紅，佢好靚之餘，生活又好簡單，畀人好積極正面嘅感覺。」
為戀愛保鮮
人前人後與老公許晉亨恩愛非常，夫唱婦隨，老公是愛馬之人，嘉欣亦漸漸被感染，「認識我老公之後慢慢對馬場有興趣，佢好有研究，有時喺旁邊聽吓佢嘅買馬心得，或者同練馬師傾偈。其實我入馬場嘅次數不算多，不過每次都很開心，好多美食，又可以見吓啲uncle、auntie。同埋小賭怡情，有收穫嘅時候都幾得意。」
感情十年如一日，嘉欣表示要保鮮戀愛感覺其實好簡單，「我哋有時會寫啲message，又或者送禮物畀驚喜大家。例如知道佢係好喜歡時間，每分每秒嘅準確度對佢都好重要，我就會送錶俾佢，收埋喺特別嘅地方等佢自己發現。」那麼老公對你做過最甜蜜的事？「都一齊咁多年，好難數最甜蜜，如果近期嘅話，佢覺得我應該要放鬆自己，就放我一個人去旅行，幫我照顧晒所有嘢，同盡量安排咗一個行程俾我可以完全放鬆。」不過送禮物還是其次，嘉欣認為相處之道首要坦承，「如果我有唔開心，我希望即時講清楚解決，唔好積埋心裡裏面。」
小JM的賭神背影
寶貝仔Jayden Max慢慢長大，嘉欣為了保護兒子，每次PO相亦只會拍其背脊或側面，神秘得跟發哥張賭神背影照有得揮。好奇小JM究竟長甚麼樣？「佢對眼同硬頸脾氣似我，好奇心同窒我嘅時候似爸爸。」爸媽遺傳如此優良的基因，都咪話唔大壓力。
更多精采時尚內容，盡在 http://add.appledaily.com。