如果一個品牌，市面一件「山寨」貨都冇，咁佢一定成功極有限。好似原本靠「山寨」起家嘅小米，今時今日，「山寨」小米多到連Groupon都中招，咁證明小米終於做到自己個名。
今次Groupon假小米「尿袋」一事，同時反映Groupon真係出事。記得最初團購登陸香港時，人人不時上網搵團購平貨。不過唔少人發現，團購產品「生命」脆弱，所以已少買為妙，加埋今次假小米電事件，就令Groupon聲譽同嚿電一齊爆炸。你可能會諗，淘寶都有大把假嘢賣啦，但點解淘寶越做越大，Groupon QC差少少就唔得。首先Groupon係「計劃經濟」，就好似一間百貨公司咁，咩貨可以喺平台出現，由公司一錘定音；而且每單生意Groupon都有分紅，客仔冇得貨比三家，而你又係既得利益者，自然有咩都入你數。
不過淘寶似一個商場，平台上「店家」無限間。A貨質量差唔賣得，仲有B貨；呢間舖生意差咩？自己執咗佢啦。另外啲人於淘寶開舖，好多係想由零開始搞生意；但Groupon對唔少商戶來講，似促銷或散貨平台。Outlet喎，質量參差是常識吧。
Groupon股價除咗上市初期炒過外，近來都於歷史低位徘徊。仲記得Groupon搞咗冇幾耐，世界各地「山寨」湧現，𠵱家仲有邊個會有心力去整個「山寨」版？由此證明團購早已out晒。
Fifi
本欄逢周二、四刊出