近來新世界（017）搞供股，又keep住有樓賣，照計作為集團第三代接班人的鄭志剛（Adrian）肯定忙到爆廠。不過熱愛藝術嘅佢，遇着5月是香港Art Basel舉行，點都要抽身參與下。華華前幾日就收到Adrian嘅邀請卡，原來佢5月會化身做策展人，為中國知名藝術家張恩利搞個展，作品將於5月12日至7月13日，在上環中遠大廈地下嘅新紀元廣場展出。展覽開幕當日下午，Adrian會喺現場與張恩利對談，有興趣嘅朋友可以去睇下。
近年有內地傳媒形容張恩利為「上海最成功的藝術家」，佢亦係現時中國知名嘅當代藝術家之一。剛剛上星期喺香港舉行嘅蘇富比「當代亞洲藝術」拍賣會，張恩利畫作《舞蹈2號》，最後就以664萬港元拍出，係該場拍賣會最高價嘅成交。