澳門，就是與別不同！濠江博企一哥金沙中國今日舉行隆重而cheap爆嘅員工大抽獎，報答多年來喺賭場俾賭客打、又吸二手煙嘅勞苦員工，獎品係十部豐田Camry汽車。十部喎！Camry喎！仲話cheap？
員工話公司鐸叔
睇真啲，原來呢十部Camry係已經落咗地六年嘅舊車，美其名為「公司御用豐田」，實際就係接客無數嘅殘車。但比起四太喺選立法會前、只係擺放幾罎腐乳鹹魚喺員工飯堂，已經好大手筆。
雖然今日抽獎，但金沙喺宣傳海報話21號先公佈得獎名單，更聲稱邀請咗前英格蘭球星大衞碧咸擔任抽獎嘉賓。萬人迷係金沙集團嘅好朋友，佢喺上年年底先同金沙簽約，幫佢哋做代言人。唔知佢知道負責送殘車，有乜嘢感想？
又有車送、又有靚仔巨星睇，金沙班員工咪好冧？唔多似喎，八方聽聞呢個賭場內嘅一眾兄弟人人搖頭嘆息，原來金沙搞抽獎送汽車已經唔係第一年，往年都會送新車，今年賺咁多反而縮皮。有員工覺得公司係諗縮數；金沙用來接客嘅私家車已經殘殘地，於是一箭雙鵰，買番批新車用嚟接客，舊車就送畀員工「振奮士氣」。
近期澳門博企打工仔嘅士氣麻麻，加薪幅度未如理想，老闆又想請外勞，半個月後嘅5.1勞動節，估計又有一班博企員工上街示威，於是乎一年一度嘅河蟹騷又嚟嘞。澳門政府今年請到張智霖同謝安琪5.1喺黑沙灣唱歌，估唔到澳門特首崔世安咁識貨，搵班港星過埠維穩，怪唔得仲有四個月爭連任，到𠵱家仲未有人出嚟挑戰佢。
mailto:[email protected]