出外成個星期，個股市好似林峯一樣「chok、chok、chok」，邊行邊走係口號！唯有望吓新股市場！
萬洲國際（288）作為全球最大嘅豬肉食品企業，同時亦係全球最大嘅快速消費品企業之一。佢哋嘅肉製品喺2013年收入佔嘅比重超過50%，營運利潤佔咗90%。
喺豬肉產業鏈嘅各個環節，由生豬養殖，到生鮮豬肉，再到肉製品，都係全球最大，同時用明顯嘅競爭優勢領先其他企業。
消費股防禦性強
從業務分佈嚟睇，萬洲國際嘅業務遍佈全球，市場份額喺中國、美國同歐洲部份主要市場排名第一。公司仲係美國最大嘅生鮮豬肉出口商，佔美國生鮮豬肉出口量嘅36.7%。
萬洲國際上市之後市值大大隻，有望短期內納入多個重要嘅指數。以招股價介乎每股8.00大洋至11.25大洋計算，上市後市值已經達1,170億至1,640億元，短期內有望納入MSCI同FTSE指數成為重要成員！
1998年雙匯發展在深交所上市嗰陣時，市值只係得嗰6億元，而家已經近千億元，飆升逾160倍。其母公司萬洲國際係全球最大嘅豬肉食品企業，喺2012年豬肉消費量佔全球總消費量嘅比例，佢哋更超過60%，係全球最大嘅快速消費品企業之一，亦係香港資本市場近年嚟最大嘅中美消費概念股。
普遍消費股防禦性又夠強，市況偏軟嘅時候抗跌能力比較好，市值同股價有望好似雙匯發展咁拾級而上。
市傳有多隻大型基金入飛，包括索羅斯基金、GIC、挪威銀行、社保基金、中國人壽、AIA等，證明資本市場對呢隻股有一定嘅信心，對股價有基本上支持作用。
今次睇到嘅牌面，應該都係無可爭議嘅全球豬肉行業領導者，繼續追蹤，出發。
中國銀河國際財富管理主管 徐燦傑
本欄逢周四刊出