曼聯前領隊費格遜退休之後，相信今個球季好多曼聯迷都好掛住佢領軍嘅日子，但就算球場上見唔到費爵爺，都可以投支爵爺珍藏嘅紅酒，懷念當年曼聯風光日子，事關愛酒嘅爵爺近日決定將佢珍藏嘅5,000支紅酒公開拍賣，其中六成下個月24號喺香港拍賣、三成6月份喺倫敦拍賣，剩番一成喺互聯網競投，預計全部最少值300萬鎊、約3,894萬港元。
呢批酒唔少係爵爺由1986年至2013年儲落，事關爵爺每打一場波，都會預備支紅酒喺完場之後開；而每次贏取錦標，佢獲贈嘅紅酒都唔少。
車路士領隊摩連奴就話當年同曼聯比賽完，爵爺就拎支紅酒去佢辦公室同佢飲，而呢批酒包括不少城中名人最愛嘅Petrus、Chateau Lafleur咁，特別係Petrus，因為爵爺接受英國傳媒訪問，曾經將佢一手捧紅嘅C朗拿度比喻為1961年嘅Petrus，認為係「瑰寶」，可知爵爺幾咁鍾意Petrus！