張慧儀前晚跟十歲養子Hanson、張可頤及陳友等，在又一城出席福音電影《真的有天堂》首映，最近多次帶養子現身公眾場合的慧儀，眼見有傳媒在場，竟然面露驚訝神色說：「我好少帶養子出嚟，唔知現場有咁多記者。」
《真》片有一幕是小朋友面對死亡的畫面，慧儀認為就算兒子看到這一幕也不用擔心，只要家長作出正面輔導就無問題。
兼顧湊仔做生意
談到照顧兒子及兼顧飲食生意，慧儀表示兒子上學時會做自己事，待他放學就要做回媽媽的責任，雖然體力付出很大，但每天都過得非常充實。
陳友透露自己信主的過程說：「上年5月太太喺美國返香港，因坐長途機太攰，返到嚟就去按摩，做完斷咗肋骨同盆骨，睇醫生可能係肝癌入骨，最多得幾個月命，係我人生最低潮時，跑咗十日，乜辦法都諗唔到，呢個時候蔣麗萍叫我祈禱，我用咗一生人最虔誠嘅心去祈求，就算有過乜罪都寬恕我。」
陳友妻患骨髓瘤
陳友之後再陪太太就醫，但得出另一個結果，他續說：「原來個病係多發性骨髓腫瘤，骨髓有變異，侵蝕咗鈣，有方法醫好個病，過程就好艱苦，不過𠵱家老婆咪等緊我返屋企食飯。」此外，同場的張可頤露腰晒肌，她笑說：「行得山多肚腩縮，𠵱家努力去練馬甲線。」
採訪、攝影：溫敏芝