憑《我是歌手2》喺內地爆紅嘅鄧紫棋（G.E.M.），將於下月2至3號喺澳門威尼斯人金光綜藝館舉行「X.X.X. Live」演唱會，兩場門票已經爆晒，馮仁昭聽聞好多內地賭客撲飛，所以加開1號特別場，但呢場門票唔會公開發售，最貴票價仲要高達$1,680，鬼咁揦脷。
之前陳奕迅3月喺澳門開騷，最貴門票只係$1,280，溫拿樂隊上星期嘅澳門騷貴飛係$1,080，估唔到身為後輩嘅G.E.M.票價竟然貴過Eason同溫拿，引起網友喺討論區爭拗，有網友留言：「講真，佢未去到呢個級數嘅價錢囉！」亦有網友為G.E.M.平反：「乜叫值唔值？講真，賣得晒，搶住買，即係值！」
再唱《龍捲風》
G.E.M.經理人張丹噚日接受馮仁昭電話訪問，佢話：「1號係私人性質，全場內部訂購同畀賭場客戶買飛，因為需求太大，$1,680呢個價錢係賭場建議，已經爆晒。」張丹話G.E.M.好開心反應咁好，個唱會加入《我是歌手2》嘅參賽歌，當然唔少得唱出分手心聲嘅《龍捲風》啦，張丹透露G.E.M.喺內地做30幾站巡唱，海外有十幾站，當然唔少得香港，佢話：「𠵱家book出年1月中紅館檔期，暫定開4場，希望可以攞到期。」
撰文：馮仁昭
