講《那夜凌晨，我坐上了旺角開往大埔的紅VAN》難免提到政治隱喻，適逢近年香港不論政治或是社會民生的氣氛日差，遊行不斷，更有人揮舞龍獅旗以表示對港英時期的懷念。找曾經拍過陳果「97三步曲」，今次於《紅VAN》內飾演白粉友的李璨琛（Sam）來談回歸後香港的變化，最適合不過。Sam坦言香港在回歸後改變不少，尤其近年更明顯，活動及表達空間明顯縮窄，更感受到一股無形的壓力。
撰文：文國駿
筆者先利申一下，身為80後的我在成長時期看了陳果執導，李璨琛主演，「97三步曲」的《香港製造》及《去年煙花特別多》，開始對自我身份有了思考，亦首次發現原來沒有劉德華式靚仔也可擔當男主角，仲要幾型。
無形壓力
日前Sam為新片《那夜凌晨，我坐上了旺角開往大埔的紅VAN》接受本報專訪，對於電影的政治隱喻，Sam坦言拍攝時未有發覺，但早前正式看完電影後才覺很有共鳴：「戲入面情況同𠵱家香港發生緊嘅嘢好似，講紅van班人困住咗，我哋呢班香港人都係走又走唔到，有能力都走咗，冇能力走先留低，似係trap咗喺度。連我70後都感覺到，何況係之後嗰啲。我好彩啲，由英國統治到𠵱家中國統治，游鹹淡水交界之間，感受都幾深，不過自己之前都冇刻意參與遊行，除咗香港電視嗰次，有需要表達訴求，香港電視件事係扼殺我哋創意空間。」
Sam又坦言回歸前後的分別頗大：「以前點都會有言論自由，各方面都有空間畀你做一啲嘢，𠵱家可能喺網上講一啲嘢都會俾人告喎，某程度上係開始縮窄咗我哋活動空間，剛剛97時都唔係好感覺到有一份無形壓力喺我哋身處嘅空間，反而今時今日就覺。最近見到王維基先生為自己夢想做一啲嘢啲機會都咁難，反而其他兩個電視台咁樣就得㗎喇？我感受好深，因為有參與香港電視製作，好可惜、好心淡、好灰。」
至於Sam在《紅VAN》中的角色甚搶鏡，他說：「我都係拍完晒先睇小說，怕睇咗先會先入為主影響角色，其實都冇諗搶唔搶，我冇加多減少，好多嘢講化學作用，有其他嘢配合。」Sam笑言道友造型神似，很大程度歸功於兩行用KY（人體潤滑劑）的鼻涕，他說：「陳果想我減番十幾磅先拍，但搞唔掂，惟有化妝上做，我覺得加鼻涕得，叫佢準備可以搽嘅嘢，搽上去又唔硬，舔吓又唔難食，幾得意喎，最後問番先知原來係KY。」
心仍未冷
跟伯樂陳果十多年後再合作，Sam表示模式上的轉變最明顯：「第一、二次同阿果合作係獨立電影，人手唔夠，但學到好多嘢，一人幾個崗位，更加有團體精神，不過壓力大同埋好攰。今次舒服，只做演員就OK。」Sam又謂陳果除外形上沒改變外，對電影的拼勁及火依然在燃燒，他笑言：「佢仲係咁嘮嘈同好火，好難得，尤其呢行咁多挫折大上大落，久別重逢，都明白呢行係咁，每次都更珍惜。」