港股市況善變的程度，連身為女人的Samantha都甘拜下風，上篇先提到炒股打醒十二分精神，恐防錯失良機，事隔幾日已經好想綁住自己雙手，唔好再掂部報價機，千隻股下跌，這分鐘掃貨，下分鐘可能已被人抬入ICU，年初完全想不到幾個月後港股會如此弱雞，沒有長升的股，皇者亦終有下台的一日，外媒報道，葡萄酒產量名列前茅的法國和意大利，被西班牙奪取皇座。
西班牙農業部門指，受惠天公造美，葡萄酒產量舊年達到50億升，上升41%破晒紀錄。據意大利和法國的數據顯示，兩國分別釀造47億升和42億升酒。雖則最具指標性，國際葡萄酒組織公佈的數字5月先有，但對西國人民來說，名次未必重要，最緊要證明佢哋終能在2008年樓市崩潰後活下來，當地葡萄酒市場研究員話，呢份成績絕不是上天眷顧，而是因為過去幾年大力投資葡萄園，摺埋效率低的莊園和提升效率。
葡萄酒產量激增，令西國舊年食品飲料出口破紀錄，同時刺激埋經濟，當地料經濟增長1%，擺脫過去幾年收縮局面，未來能否靠葡萄酒食糊，都係東望消費強勁的神州，視乎強國人對品酒民智是否成熟，跟品牌定跟質素？以氣泡酒為例，Samantha覺得西班牙的Cava和意大利的Prosecco一啲都唔輸蝕，反而法國香檳倒是中過幾次伏。
Samantha
本欄逢周三、五刊出