查實狼班子已經上任咗近兩年啦，而其中嘅律政司司長袁國強，舊年年底開始拍住林鄭月娥搞政改，見報率都唔少㗎，點解政府總部嘅保安，仲唔知佢係邊個㗎？
話說袁國強噚日晏晝，施施然行過去政府總部東座，準備出席同唔同團體如廠商會及學者等見面談政改；點知行到去東座入口，現場保安望一望佢問咗句：「有乜幫到你？」繼而竟然要求司長攞個證嚟睇睇。據聞呢位不知道袁國強是誰嘅保安，最後當場俾保安阿頭鬧到狗血淋頭，反而袁國強就笑笑口，冇乜所謂，唔通類似情況時有發生？
政府噚日亦宣佈前勞工處處長卓永興5月2號出任律政司政務專員，接替要退休嘅何健華；現任差餉物業估價署副署長鄧炳光就會喺下月5號升呢，接替要退休嘅曾梅芬出任署長。