成班建制派喺訪滬政改大龍鳳淪為佈景板，冇計㗎，阿爺攞明只係想溝……通泛民之嘛，作為「親生仔女」就算不滿都要「犧牲」吓，幫手搭台促成呢次speed dating。八方聽聞，建制派確實有人不甘淪為大花瓶，喺訪滬期間不停攝位爭曝光，最後仲逼到政制局局長譚志源讓位。咁有鬥心，自然係新民黨主席葉劉淑儀。
逼走譚志源博影相
查實訪滬大龍鳳呢齣劇目，建制派早知自己只係大茄；民建聯同經民聯都好理解自己角色，但新民黨似乎唔係咁諗。八方聽聞葉劉喺此行不斷攝位，想搶佔有利位置，等大家都知道佢都有去上海㗎，而佢嘅攝位功力更令唔少議員嘆為觀止。
話說上周六，立法會議員同上海市委書記韓正會面時，座位安排係論資排輩而定，2008年先入立法會嘅葉劉，按道理坐第二行，點知最終佢竟然坐咗喺第一排第一個位，即係傳媒一定影到嘅位。原來嗰個位，本來係政制局局長譚志源㗎，但有目擊者話，葉劉一入去就坐咗落嗰度；譚志源到場見狀，當然唔介意讓位畀呢位AO前輩，葉劉理所當然卻之不恭。
據聞周日建制派理應退席，讓路畀泛民同京官單獨「談心」嘅時候，葉劉都有意留守呢場重頭戲，唔畀泛民搶晒風頭，但一般男女關係，既然已經係囊中物，點會再百般遷就？據聞有人即場提點佢，此地不宜久留，葉劉終於無得留低。
mailto:[email protected]