民建聯噚晚舉行籌款晚會，籌務全年蛇齋餅糭經費，成班黨員出盡渾身解數娛賓，重頭戲係黨主席譚耀宗高歌一曲「舊歡如夢」，仲有陳克勤拍住葛珮帆、高佬賢同Starry、陳恒鑌配元秋，以七十年代打扮跳懷舊老舞，各人嘅演出，八方現場睇觀眾反應，絕對係驚為天人。
民記出身嘅問責官員包括蘇錦樑、劉江華、徐英偉同陳百里亦要大跳街舞，原來佢哋之前都搵咗專人傳授舞功，但劉江華打天才波冇練過，結果第二part自動落台免出醜。其他看點仲有狼太一貫嘅打扮，至於近日曝光率甚高嘅羅霖，一到場就成為焦點，八方見到佢同局長高永文合照，兩人幾好傾，原來係舊相識，不過高永文話未睇羅霖套新戲呀。
全晚咁賣力演出，無非係想善長慷慨解囊，譚耀宗噚晚宣佈好消息，民記只會兩年先搞一次籌款晚會，等大家唔使太肉痛。