由秘婚生女到出書承認自己係有家室之人，著實「嚇親」唔少fans，估唔到偶像咁早結婚同時估唔到佢咁長情。嚇親之後，大家都齊聲送上祝福，仲希望愛家之人吳尊可以晒埋全家福，等大家可以同佢一齊分享喜悅嘛。及後吳尊再一索得之，名字同相片都唔肯公開，反而願意俾三歲女兒NeiNei慢慢公開亮相，step by step先由吳尊個blog po相，進而帶佢拍嘢——冇錯，又係強國節目《爸爸回來了》，毫不隱瞞就係食住《爸爸去哪兒》條水。浙江衛視嘅《爸爸回來了》昨日舉行記者會，吳尊同王中磊、賈乃亮、李小鵬等四個爸爸都有出席，NeiNei雖然冇，但之前佢同爸爸吳尊已經拍咗啲片，展示父女倆單獨相處48小時間發生嘅點點滴滴，昨日記招就播片花，節目正式將於4月下旬播出。由花美男到成為美男爸爸，就連囡囡都身價暴漲。以後想睇星二代？有價有市咪得囉。