合和實業（054）舊年年中擱置分拆合和香港房地產上市，原本大家都忘記咗呢隻新股，之但係，港交所（388）嘅披露易噚日朝早出現少少蝦碌，令大家輕易發現正在公開招股嘅豬肉股萬洲國際（288）原來已經搶走咗合和地產嘅股票編號。
噚日晨早8點半前，萬洲將招股書放上披露易，但竟然同時出現萬洲同埋合和香港房地產兩間公司名，直至9點半左右，萬洲再將招股書再放上披露易，呢次就得佢一間公司個名。
經了解後發現，今次只係港交所蝦碌，搞錯咗些少設定手續，港交所相關人員發現後已立刻更正並通知萬洲嘅保薦人，不過呢個蝦碌場面全日都會喺度，唔係港交所可以隨時話刪就刪，要等到整個披露易系統喺晚上11點關閉之後先可以刪走。