左丁山前日講過自己係「雅禮之友」，每年都有捐錢俾雅禮協會（Yale-China Association），雅禮協會成立113年，1950年代初（1953）協助新亞書院建設農圃道校舍，派「耶魯學士」到新亞教英文，呢段歷史，係新亞校友都知，左丁山係英文課程得益者，對老師黎天睦之恩念念不忘，所以每年都捐番少少錢俾並不富裕（以廿一世紀標準睇）嘅雅禮協會，以示謝意。
第一位到香港嘅耶魯學士係一位Douglas Murray先生，佢就係左丁山老師郭益耀教授（新亞經濟1962）嘅英文老師，在美國曾任「嶺南基金會」（Lingnam Foundation）嘅主席，中文大學成立不久，就得到嶺南基金贊助，成立MBA課程，所以當時之中大工管碩士學院就叫做The Lingnam School of Business，早期嘅畢業生（MBA）有李金漢教授、簡文樂（現中大校董）等等。梅利先生去年來港參加中大五十周年校慶盛會，郭益耀教授特別請梅利先生夫婦到中華總商會午膳，席間佢講起在1958-1960年喺新亞教英文時，曾試過揸電單車，錢穆先生坐在車尾，但只係拍照而已，錢先生唔肯與佢駕車飛馳。後來，雅禮協會2013年冬季會刊嘅封面照片就刊登咗呢一張照片，電單車車牌HK973，梅利與錢先生穿西裝打呔坐在電單車上，笑容可掬，錢先生且面戴太陽眼鏡，罕有地輕鬆。呢張當然係歷史性圖片，成為雅禮協會在香港工作嘅歷史見證。
雅禮協會與耶魯有緊密聯繫，總部設於耶魯大學所在地New Haven，但並不受耶魯大學指揮，之不過，耶魯嘅東亞研究所對香港情況素來關注，著名教授蕭鳳霞（Helen Siu，陳啟宗之聖保羅男女同學），在人類學赫赫有名，曾擔任耶魯嘅Council on East Asian Studies嘅主席，到過中大、港大做客座研究教授，佢嘅同事，社會學名教授，亦曾任耶魯東亞主席嘅Deborah Davis會在下個星期（四月二十四日）在耶魯舉行一個座談會，主題係「香港媒體自由何去何從」（Freedom and Fear in Hong Kong Media），香港記協副主席任美貞會透過Skype發言，其他講者有陳志武教授、康正果及Thomas Kellogg，我地雖然參加唔到，但美國重量級學者關心香港新聞自由，香港新聞界更應重視。