五礦資源（1208）開始搞業務壯大，由上個月11日低位，亦都係五年低位1.22元，到噚日最多大升咗64%。而同系五礦建設（230）喺五年低位就未郁過，但掌舵啱啱上月尾講明，嚟緊可注資規模高達300億銀，係五礦建設家陣市值嘅10倍，抵博！
五礦建設市值得29億銀，係最細一隻內房央企，就算集團喺呢個五年低殘價（0.9元）翻一番到1.8元，再透過配售1倍嘅股數或CB，集資得59億銀咁大把，根本就啃唔落大size注資。更何況，對口五礦集團揸咗五礦建設62%，斷估，喺低位發大量股票或CB，壯大市值再注資，唔係幾行得通。
注資大計吸引
更有可能做法係，等股價先升高，再注資，周而復始，步步長大。所以，嚟緊日子，單係注資呢個point，已經刺激十足。又呢期五礦資源，喺終極對口五礦集團支持下，收購壯大業務，冇理由獨漏五礦建設。再講，內房注資大計，由極少見香江傳媒嘅掌舵孫曉民述釋，所以，就算對口單位五礦集團日後整體上市，應該無改五礦建設內房旗艦角色，呢個牌頭，好值租！
五礦建設NAV 2.32元，折讓62%。唔計集團坐擁4,000萬平方呎土儲，集團呢個市值，只係等於兩幢香港物業咁大把，五礦品牌，殘得咁離譜？又月頭祖國傳媒報道話阿爺有意放寬內房限購令。阿爺要保經濟，空穴來風，未必冇因。
家陣場內四大央企平均PB上到0.9倍，五礦建設翻半番到1.35元，PB先得0.58倍，而呢個股價市值先得44億銀。好似上邊講，集團要注資，仲係有難度。又計到2007年高位3.87元，集團總市值130億銀，先有啲睇頭，而現價係講緊要升3倍！
錢 雋
細價股專家
本欄逢周二、三、五刊出