張栢芝喺昨日凌晨電台訪問內，大爆遭初戀男友hurt爆經過，佢認同第一次嘅分手經歷，令佢以後諗多咗，個人會變得更加成熟。栢芝慨嘆男仔好少回望自己做錯，佢又自爆想搵40至43歲嘅成熟男。栢芝表示後生時乜都玩過，0依家個人就定性，邊度都唔想去，就想留喺屋企煮飯及湊仔，男女都好，後生時玩過晒，到開始成熟時，呢啲先係極品。而主持又以陳小春做例子，指佢後生時乜都玩過，但返到家就係好男人，栢芝亦認同。男主持又講到唔少男人過咗30幾歲，就開始身痕，一出去玩畀人撩下腳，就會即刻出軌，栢芝亦附和：「邊有貓唔食魚？十次引誘頂得住，三十次我就唔信。」主持又問到年紀愈大，戀愛想法會漸趨成熟，栢芝就話：「呢度我係年紀最大，冇錯，會成熟好多，思前想後好多﹑顧慮亦多，後生靚仔吸引唔到我。」男主持笑栢芝：「因為你試過好多靚仔。」栢芝就話：「之前我同鄭中基傳緋聞，佢有幾靚仔？（外籍男友都唔靚仔？）係呀，我以前個外籍男友都唔靚仔。」栢芝又認為呢個世界至愛嘅係自己：「你阿媽至愛係你，你幾愛你老婆，其實至愛仲係自己。」主持又話女人到咗40歲，對愛情會採取抗拒態度，因為覺得已經「唔輪到佢哋」，栢芝都承認自己接近呢個歲數依然單身，有時都會覺得寂寞：「始終會lonely，我都習慣單身模式，享受想做就做，但somehow有時會寂寞。」但栢芝話最重要係對自己有信心，要先懂得欣賞自己美麗，其他男人就會自然感受你的美，幾多歲都唔緊要，最緊要你覺得自己有價值同值得愛，男人自然好愛你。栢芝又以劉嘉玲﹑鍾楚紅﹑林青霞﹑羅蘭及鮑起靜做例子，唔係話佢哋年紀大，而喺佢哋嗰份自信及魅力，勝過唔少0靚妹，就算唔係靚女，味道好重要。栢芝表示女人千祈唔好40歲扮20歲:「如果40歲，整個大眼仔影相，嘩﹗酒杯敲你個頭，我心極痛。」之後佢再話：「我見過有啲老女人，好驚，着到好似十五﹑六歲，頭戴粉紅色蝴蝶結，嘟起嘴影相，仲要高炒﹗」