「呢球波，一係入、一係唔入。」估唔到黃興桂呢句街知巷聞嘅金句，連全國港澳研究會副會長劉兆佳都受感染。噚日佳叔喺一個論壇上，大談對政改談判嘅意見，席間仲向在場嘅來賓，分享佢獨到嘅心得㖭，就係特區嘅政改發展，最終可能有兩個結局㗎。第一個，當然係方案不獲通過，政改原地踏步啦。至於第二個結局係乜嘢呢？相信聰明嘅八方讀者睇到呢度，已經估到嘞，就係方案會順利獲得通過囉。
嘩，咁難嘅題目，都俾佳叔破解到，難怪在席聽講嘅人都丫大個口好驚嘆，真係不枉中央向佢委以研究香港發展嘅重任咯。如果佳叔拍住黃興桂搞研究，話唔定會有驚世大發現喎。