港大醫學院一名女生近日喺facebook大講人生經歷，結果引起網民反內地人情緒。呢位女生Betty舊年獲港大取錄，但佢當時只係攞住行街紙，十年來都冇香港身份證，因佢係偷渡嚟。
Betty身世都幾可憐，係港人內地子女。據佢喺fb講，因為係第二胎，一直怕俾人發現唔可以返學，過住不見天日生活。媽媽同家姐嚟咗香港，佢喺2003年八歲時展開千里尋親，跟船從水路偷渡嚟香港，佢話爸爸收到蛇頭電話就贖番佢，「卻甚麼責怪的話都沒有，倒是稱讚了我一下，說我很厲害」。佢後來到入境處自首，入境處人員唔信佢自己嚟，但佢一直堅持，結果，「這場精神搏鬥我贏了，戰利品是一張讓我合法地出現在香港街道上的行街紙」。
Betty攞住行街紙，好唔容易搵到一間小學村校收佢，佢話因身份問題，升中入到唔係咁好學校，高中時成功轉咗去英中；舊年中大醫學院有面試，但因冇身份證，中大唔敢收住，最終獲港大收咗。今年初仲飛甩埋行街紙攞到身份證。佢喺fb炫耀，點知唔少網民話佢太寸，高登一日有35版留言，反問政府點解喬寶寶個老婆拎唔到身份證，反而佢得，有人仲發起向港大投訴。