蘇富比、佳士得、嘉德等大型拍賣行剛在港完成春拍，馬雲旗下阿里巴巴嘅淘寶網竟然接力，將於本周四、五（17至18日）舉辦已故畫壇大師吳冠中藝術專場，網上拍賣吳冠中45幅作品。
好多人只係上淘寶買衫、用品之類，好少去淘寶個拍賣平台，早前馬雲就寫咗幅墨寶擺上去拍賣，等多啲人知道呢個拍賣平台，估唔到佢認真到同內地拍賣行合作拍賣吳冠中作品，主打吳冠中喺1977年所畫嘅《龜》，80萬（人民幣．下同）起拍，每口價2,000元，競投者要畀2萬元保證金。
早前嘉德在港春拍，吳冠中1996年所畫嘅《交臂》以2,300萬港元成交。究竟有幾多人會斥巨資上淘寶買畫呢？