《那夜凌晨，我坐上旺角開往大埔的紅van》，有網民話cult，有更多網民話睇唔明，同埋唔好睇。亦有人話套戲太多嘢冇交代到，似是為下集舖排……你，唔係諗住佢唔拍呀嘛……噚日陳果話如果票房達二千五百萬，都可以考慮拍續集。日前香港電影金像獎上，陳果任頒獎嘉賓，當時佢喺台上解釋點解可以再上頒獎台，佢話:「因為《紅van》，你話幾現實呢？所以都要多謝Golden Scene，將我從火星召返嚟。」又同小紅一齊呼籲大家再睇多次《紅van》，咁就有機會拍續集。好喇，噚日陳果出席宣傳活動，被問到有網民話睇唔明，同埋唔忠於原著，陳果話：「呢個好似van仔乘客，你搭上去唔使明太多，慢慢會搵出個結果，一部電影唔可以取悅全世界，我照辦煮碗又話我懶，佢哋可能唔係睇電影，係睇緊電視，唔明唔緊要，睇多次就明。」至於女主角JM就話：「睇完小說嘅朋友，一定會有好大對比，每個人睇完小說感覺唔同，好難滿足每個人想法，我幾鍾意陳果導演呢個拍法。」