「滬港通」上周宣佈進入直路，投資界好亢奮，即刻四出搵投資機會，搵吓邊類受惠股炒得過。睇開中國房地產嘅瑞信分析師杜勁松好快出咗份報告，力撐愛股萬科，認為係最佳選擇㖭。
好多基金經理睇完佢份報告覺得好奇怪，萬科雖然係內房龍頭股，但佢喺深圳上市，今次呢個話明係滬港通，唔關深圳交易所事，深圳股份冇份㗎喎，兼且仲要等半年先成事，萬科點樣受惠呢？唔通杜勁松收到風，好快會開通埋深交所？
杜勁松噚日就澄清話，絕對冇呢回事，佢只係預測滬港通落實之後，好快輪到「深港通」，從而推斷萬科將間接受惠。
之不過現時啲投資者睇得咁短線，到滬港通真係落實，已經炒咗好多轉啦。翻查資料，杜勁松就真係好捧萬科，2009年之後，都係畀呢隻股「跑贏大市」嘅投資評級，目標價亦越調越高。