自微軟新CEO上場後，新人事新作風，不但「免費」向手機、平板生產商批出Windows授權；上月底更公佈不再玩獨家村，推出iPad版Office，更容許手機版Office免費編輯文件。
由用家角度睇，直頭係皇恩浩蕩。據公佈，iPad版Office上架後一星期，已錄得1.2億次下載。大摩亦發報告，預期iPad版Office會為微軟一年額外增加13億美金收入；微軟股價亦因此曾創過去14年新高。所以今次「破格」行動，算係叫好叫座。等到今時今日先開始行「Freemium」策略，係遲，但好過冇到。
講到「免費策略」，微軟本身就係專家。過去十幾廿年，由DOS到Windows XP嘅翻版如恒河沙數，正因為微軟一直對翻版都係隻眼開隻眼閉，結果所有人對Windows都用慣用熟走唔甩，終令微軟成為一代皇者，之後剩係賣啲軟件畀電腦生產商，收錢收到手軟啦。
由以前包容翻版，到今日所講嘅Freemium，變相話你聽少少嘅慷慨，會帶來更大回報。𠵱家小米盒子賣到成行成市，想睇波、想煲劇，唔理乜國家嘅節目話睇就睇。你亦唔會聽到韓國電視台阻截網上煲《星星》、湖南衛視出力封殺影視App連載。因為𠵱家電視台sell客時，大可以話全亞洲都係目標觀眾，傾廣告費時牙力大幾多！小米盒子既唔會被「動真格」封殺，自然長賣長有。
Fifi
本欄逢周二、四刊出